Acharya Tulsi
षष्ठः प्रकाशः
- सम्यग्दर्शन - ज्ञान-चारित्र-तपांसि मोक्षमार्गः ।
- यथार्थदृष्टिः सम्यग्दर्शनम् ।
- यथार्थबोधः सम्यग्ज्ञानम् ।
- महाव्रतादीनामाचरणं सम्यक्चारित्रम् ।
- सामायिक-छेदोपस्थाप्य-परिहारविशुद्धि सूक्ष्मसंपराय-यथाख्यातानि ।
- अहिंसा सत्यमस्तेयं ब्रह्मचर्यमपरिग्रहश्च महाव्रतम् ।
- प्राणानामनतिपातः सर्वभूतेषु संयमः अप्रमादो वा अहिंसा ।
- सद्भावोद्भावनं सत्यम् ।
- अदत्ताग्रहणम् अस्तेयम् ।
- इन्द्रियमन:संयमो ब्रह्मचर्यम् ।
- ममत्वविसर्जनम् अपरिग्रहः ।
- ईर्या-भाषा- एषणा आदाननिक्षेप उत्सर्गा; समितिः ।
- युगमात्रभूमिं चक्षुषा प्रेक्ष्य गमनं ईर्या ।
- अनवद्यभाषणं भाषा ।
- निर्दोषान्नपानादेरन्वेषणम् एषणा ।
- उपध्यादेः सयत्नं व्यापरणम् आदाननिक्षेपः ।
- उच्चारादे: सविधि परिष्ठापनम् उत्सर्गः ।
- मनोवावकायसंवरो गुप्तिः ।
- मनःस्थैर्याय अनित्याद्यर्थानुप्रेक्षणं अनुप्रेक्षा ।
- पुन: पुनरासेवनमध्यासो वा भावना ।
- अनित्य अशरण-भव-एकत्व- अन्यत्व-अशौच-आश्रव-संवर-निर्जरा-धर्म-लोक-बोधिदुर्लभताश्च ।
- देशतश्चाणुव्रतशिक्षाव्रते ।
- स्थूलहिंसा मृषा-स्तेयाऽब्रह्मविरतिः इच्छापरिमाणं च अणुव्रतम् ।
- दिगुपभोगपरिभोग- अनर्थदण्डविरति-सामायिक-देशावकाशिक पौषधोपवास- यथासंविभागाः शिक्षाव्रतम् ।
- दर्शन-व्रत- सामायिक-पौषध-कायोत्सर्ग- ब्रह्म-सचित्ता-रम्भप्रेष्योद्दिष्टवर्जन-श्रमणभूताश्च प्रतिमाः ।
- मारणान्तिकी संलेखना ।
- परिग्रहविसर्जन-प्रव्रज्या भक्तपानप्रत्याख्यानविषये पर्यालोचनं महानिर्जराहेतु ।
- इन्द्रियमनोनिग्रहकारकमनुष्ठानं कर्मशरीरतापकत्वात् सम्यक्तपः ।
- अनशन- ऊनोदरिका-वृत्तिसंक्षेप रसपरित्याग कायक्लेश प्रतिसंलीनता बाह्यम् ।
- आहारपरिहारोऽनशनम् ।
- अल्पत्वमूनोदरिका ।
- नानाभिग्रहाद् वृत्त्यवरोधो वृत्तिसंक्षेपः ।
- विकृतेर्वर्जनं रसपरित्यागः ।
- कायोत्सर्गाद्यासनकरणं कायक्लेशः ।
- इन्द्रियादीनां बाह्यविषयेभ्यः प्रतिसंहरणं प्रतिसंलीनता।
- प्रायश्चित्त-विनय-वैयावृत्त्य-स्वाध्याय-ध्यान व्युत्सर्गाश्चाभ्यन्तरम् ।
- अतिचारविशुद्धये प्रयत्नः प्रायश्चित्तम् ।
- अनाशातना बहुमानकरणं विनयः ।
- परार्थव्यापृतिर्वैयावृत्त्यम् ।
- श्रुतस्याध्ययनं स्वाध्यायः ।
- एकाग्रे मनःसन्निवेशनं योगनिरोधो वा ध्यानम् ।
- धर्म्यशुक्ले ।
- आज्ञा-अपाय-विपाक-संस्थान-विचयाय धर्म्यम् ।
- पृथक्त्ववितर्कसविचार एकत्ववितर्काऽविचार-सूक्ष्मक्रिया- प्रतिपाति समुच्छिन्न-क्रियाऽनिवृत्तीनि शुक्लम् ।
- नार्त्तरौद्रे तपः ।
- प्रियाप्रियवियोगसंयोगे चिन्तनमार्त्तम् ।
- वेदनायां व्याकुलत्वं निदानं च ।
- हिंसा अनृत-स्तेय-विषयसंरक्षणार्थं रौद्रम् ।
- शरीरकषायादेः परित्यागो व्युत्सर्गः ।
इति मोक्षमार्गनिर्णयात्मकः षष्ठः प्रकाशः
